Daxili Xəstəliklər Dərnəyinin yaranması və məqsədi

Terapiyanın inkişafına kömək etmək məqsədilə, daxili xəstəliklər və ailə həkimliyi sahəsində yerli və beynəlxalq səviyyədə böyük uğurlara imza atmış bir qrup müxtəlif ixtisas sahibi olan mütəxəssislər tərəfindən 2022-ci ilin dekabr ayında Daxili Xəstəliklər Dərnəyi təsis olunmuşdur. Qeyri-hökümət təşkilatı kimi fəaliyyət göstərən dərnəyin yaradılmasında əsas məqsəd terapiya sahəsində olan tədqiqatları daha da böyütmək, eləcə də Azərbaycanda böyük yaşlı şəxslərin sağlamlığını təşviq etmək, terapiya elminin inkişafına dəstək olmaqdır. 

Yarandığı gündən bugünə qədər dərnəyin təşkilatçılarının və üzvlərinin gördüyü işlər müvafiq istiqamətlər üzrə aparılır: müxtəlif mövzularda regional və beynəlxalq konfranslar təşkil etmək; həkimlər, rezidentlər və tibb tələbələri üçün seminarlar və təlimlər təşkil etmək; ölkənin müxtəlif regionlarında terapevtik xəstəliklərin diaqnostikası və müalicəsi ilə bağlı iclaslar və tədbirlər təşkil etməkdir.

Dərnəyin qarşıya qoyduğu digər məsələ isə əhali arasında maariflənmənin aparılmasıdır. Məlumdur ki, hələ də bu və ya digər səbəblərdən həkim müayinəsindən kənarda qalan vətəndaşlarımız az deyil və mütəmadi və dövrü skrininq müayinələrə qatılmadıqları səbəbindən onlar arasında daha çox ağırlaşmalar müşahidə edilir.

Daxili Xəstəliklər Dərnəyi tərəfindən “Terapiya Jurnalı” da təsis edilmiş və 2024-cü ildə ilk sayının dərci nəzərdə tutulur. Jurnalın hər il 2 nömrəsi dərc ediləcəkdir. Bundan əlavə dərnək Beynəlxalq Daxili Xəstəliklər və Terapevtlər cəmiyyətlərinə üzvlük üçün rəsmi müraciətlər edibdir.